المساعد الشخصي الرقمي

مشاهدة النسخة كاملة : مساعدة : تغدية الطفل البالغ من العمر 4 أشهر



حنان103
01-02-2010, 11:04
أخواتي ارجو المساعدة، ابني بلغ شهره الرابع هل تنصحونني بإضافة بعض الاغدية الصلبة الى تغديته ام الاكتفاء بالرضاعة الطبيعية الى الشهر السادس

مغربية و افتخر
01-02-2010, 11:49
اختي اربعة اشهر باقي صغير معدتو متستحملش
شوفي صلقي الخضرة و عطيه الماء ديالها فقط
انا تنبدا الماكلة حتى 6 اشهر تنتبع نصائح الطبيبة
تجنبا لاصابته بحساسية و حتى معدتو باقة متستحملش الماكلة
و فحالة الى بغيتي توكليه شربي كي قلت الماء ديال الخضر
و حليب الام فهاد السن راه غداء كامل
الله يخليه لك

حنان103
04-02-2010, 16:10
مشكورة اختي على مرورك انا هذي كانت فكرتي ولكن الناس تيقولولي ضروري تعطيه الماء و و و و دخلوليا الشك خفت مشككككككككورة

om adam1
04-02-2010, 17:53
ختي ولدك باقي صغير على الأكل حليب الأم راه كافي فيه الماء و كل ما يحتاج الرضيع

أما الأكل حتى ل 6 شهور من الأفضل

فاطمة04
06-02-2010, 18:44
السلام عليكم ورحمة الله وبركاته
اختي حسب تجربتي انا بديت للماكلة نولدي ملي عمل 4 اشهر صراحة ماكانش بقى يشبع غير بالرضاعة وكان يبقى عينه على مكلتنا فاش نكون ناكل لهذا بدات باعطائه خضر وفواكه مسلوقة لهذا كايبقى وقت البدا بالاكل للاطفال حسب كل طفل اتمنى اكون افدتك بتجربتي

أم ميري
09-02-2010, 12:27
هتا أنا نفس المشكلة بنتي عندها خمس شهور أمزال معطيتها الأكل مكتافيا غير بالرضاعة الطبيعية

عطر الشهادة
09-02-2010, 16:09
الله يخلي ليك وليد بالنسبة لتجربتي مع بنتي كنت تنعطيها الماء الخضر لمسلوقة فالرضاعة كنت تنخلط معاه الحليب ديال الفرماسيان و كنت بديت ف 4 اشهلر تنعطيها جيرفي بتي سويس ديال 1درهم واحد تنخلط معاه شوية الماء باش يخفاف و نعطيها فالرضاعة اما بالنسبة للماء بديت تنشرها ماء عين سايس ملي كانت عندها 3 ايام حيت انا مارضعتهاش البزولة اما مورا 4 اشهر انا دخلت الخدمة و الوالدة ديالي ولات تتعطيها كل شي ماكاين غير تلغاج هههههههه

حنان103
09-02-2010, 16:27
مشكورات اخواتي على المساعدة الله ارزقكم بيت في الجنة ان شاء الله

nananouna
10-02-2010, 13:47
أختي أنا أولادي بديت ليهم الأكل من 4 شهور واخا كايقولو 6 ولكن أنا بغيتهم غير إيمتا يبداو ياكلو هههه و دابا عندي وليد عندو 3 أشهر و نص *أختك كتولد غير الأولاد هههه* وبديت تنعطيه ماء الروز و دانينو أزرق و أكيد الماء من الأول حيت كيجيني مسكين عطشان و انشاء الله ملي يكمل 4 شهور نبدا نعطيه خيزو و التفاح واخا ماما مني كتشدو وهيا كتوكل فيه حتى من الكروفيت عطاتو ليه هههه والحمد لله داز هداك النهار بخير

ماجدة ام تسنيم
25-05-2010, 11:43
ضحكتوني بارك الله فيكن
فدتوني بزاف

حوااء
25-05-2010, 13:12
ههه ضحكتوني الله يحفظ وليداتنا جميعا نصايح الاخوات وافية حتى أنا قلت ما نعطي والوا لولدي انشاء الله حتى لست شهور يااارب يخليهم لينا ....

الانيقة المصونة
25-05-2010, 14:31
اختي حرنا انا بعد صدعو ليا راسي شي كيقول ليا عطي لبنتك الماكلة من 4 شهور شي يقول ليا حتى لستة الشهور اوى حيت بنتي قليولة عطيت ليها غير الما ديال الخضرة مسلوقة ف 4 شهور ولكن مكتبغيهاش او حتى الشهر الخامس هلي بديت كندخل ليها الماكلة شوية بشوية الما والو مكتبيش تشربة وكتدفع ليا بسلامتها الرضاعة بيديها اما الى عطيت ليها فيها الحليب كتشدها مطلقهاش حتى تشبع اناقة ريم ضحكتيني حتى ماما انا كون جات عليها كون عطاتها الماكلة من 3 شهور الى كنا كنكلو كتعتيها شوية كتقولي يحنة حشومة كتبعنا بعويناتنا او كتعطيها شوية غير نش تدوق اما رجلي عطاها الشكلاط او عجبها كنولي انا نحبس ماما نحبس راجلي او بعد اليوم كملات 6 شهور نخليهم يدوقوها ههههه

بشرى11
25-05-2010, 16:22
حتى انا بحلك عندي وليد غادي يكمل 3 اشهر غدا او كنفكر نبدا ليه بماء الروز او ماء الخضر او عصير البرتقال يعني شوية بشوية حيت فولدي الاول مكنت عارفة والو او كنت متبعا عند واحد الطبيب فيه كترت لفهامات قال ليا حتى يكمل 6 اشهر عاد بديت ليه ولكن رفض الماكلة نهائيا تيبقى يبكي ويجيه الرضان حتى كنعطيه البزولة عاد يسكت والله الى عانيت معاه بزاف معمرو رضع الرضاعة بحال لوليدات اولا كال حتى يشبع ديما تنكمل ليه بالبزولة حتى خرج كي العويد هدشي علاش قررت نبدا لولدي التاني بكري او كل الاخطاء الي درتها فاللول نتجنبها فالتاني ان شاء الله يا الله الحبيبة الله يخلي ليك وليدك نتمنى نكون فدتك او حاجة اخرى متنسايش الماء عطيه ليه باش يولفو واخا تيرضع البزولة مرة مرة عطيه شوية الماء

om_ramy
19-07-2010, 14:07
انا بنتي باقي لها اسبوع تقفل 4 اشهر
ربي يحفظهم لنا و يكبرهم لنا
امين يا رب العالمين

وهج الايمان
23-07-2010, 18:24
بارك الله فيكن

casa-zanouba
27-07-2010, 16:51
akhti ana waldi bdit lih makla 3la 4 chehour 3tito cereal dyal dawla li 3aycha fiha madar lih walo o mli bghit na3tih cerelak dyal maghreb darato o ana nahbas lih makla fi daka hta karab ydir 6 chehour o bdit 3awtani na3tih kana3tih ga3 khodar o fawakih takriban hta man dalah o swihla kana3tihom lih ymasehom o elhamdo lilah mawka3 lih walo ghir homa had ayam sninat imkan bghaw ykhorjo mabak kayakol liya hta haja bazola bazaz bach kaychadeha

sanaezgh
27-07-2010, 17:16
بالنسبة لتجربتي خليت بنتي حتى كملات ستة اشهر عاد بديت ليها الاكل و النتيجة كاترفضو رفضا قاطعا و راها دابا عندها ثمانية اشهر و مازال كانعاني معاها ماكاتبغيش ليا الملعقة نهائيا و ملي كانبغي نعطيها سيريلاك او الصوبا كانعطيهوم ليها بالرضاعة و بالدباز اما دانينو كانخلطو مع ماء سيدي علي و نعطيه ليها حتى هو فالرضاعة.و لكن هي صراحة ملي خلاقت و رضاعتها قليلة.اما دابا ماكرهاتش فين ماجاها الجوع نعطيها غير الحليب فقط حيث هو اللي كاترضعو بلا ماتعصبني.

oum.youness
03-08-2010, 18:12
انا ولدي و حتى بنتي بديتلهم لماكلة مني دخلو فالشهر 5 :
فصباح كنرضعهوم حليبي و شوية عصير ليمون.
فلغدا شوية لخضرا مسلوقة .كل نهار تنضيف نوع و طبعا ماشي بزاف قياس 2 معالق .
فلكوتي تفاحة مسلوقة و معكيها مع شوية لعسل او عصير طماطم او 2 تميرات كنغسلهوم و نديرعليهم شوية دلما طايب و نصفيهم.
او لعشا شوية لخضرا مسلوقة او صفر بيضة مطلوق بشوية لحليب .
و طبعا كنرضعهوم وقتما حتاجوها.اما الروز فمكنكتروش حيت تيوقف ليهم كريشتهوم (اعزكم الله).
و نوصيكم الحبيبات متوكلوش لكبيداتكم لي سرياال او الاكل الجاهز للرضع اللي كيتباع فالمحلات التجارية و حتى فالصيدليات راه كلها مواد حافضة و خطيرةعلى الصحة د وليداتنا.ووكلوهم اخواتي اكل طبيعي